19 / 108
17
ÚR VERKFÆRAKISTU KENNARANS :
SKAPANDI SKÓLI
Hvað er góð hópvinna?
Nemendur eru eins misjafnir og þeir eru margir og búa yfir ýmsu
sem auðveldar þeim eða torveldar að vinna í hópum. Samvinnu og
hópastarf þarf því að þjálfa markvisst og nemendum þarf að vera
ljóst hvað það þýðir að vera hluti af hópi sem leysir verkefni saman.
Að sjálfsögðu þjálfast samvinna eftir því sem skólagöngunni vind-
ur fram og nemendur eldast og þroskast en þó er ekki úr vegi að
ræða öðru hverju til hvers er ætlast af nemendum þegar þeir vinna
verkefni í hópum og jafnvel getur verið áhrifaríkt að hafa sýnilegt
í kennslustofunni spjald sem minnir nemendur á ábyrgð þeirra í
hópvinnunni. Slíkt er auðvitað enn áhrifaríkara ef nemendur hafa
sjálfir tekið þátt í að móta þær vinnureglur sem þar er að finna.
Gott er að hafa eftirfarandi atriði til viðmiðunar þegar rætt er við
nemendur um samábyrgð og vinnu í hópum.
Einstaklingsábyrgð
Hver og einn ber ábyrgð á sjálfum sér og sínum vinnubrögðum.
Samábyrgð
Hver og einn ber líka ábyrgð gagnvart hinum í hópnum.
Það þýðir að verkefnið er allra og allir þurfa að leggja
vinnu í það.
Vandvirkni
Mikilvægt er að vanda til verka, hvort heldur er við ritun,
myndskreytingu, gagnaöflun eða annað, þannig að allir
í hópnum séu sáttir við útkomuna.
Úthald
Allir í hópnum þurfa að vera virkir á meðan
á vinnunni stendur.
Samhjálp
Nauðsynlegt er að hjálpast að við einstök verk og komast
að samkomulagi um hvernig best sé að framkvæma hlutina.
Virðing
Hópmeðlimir eiga að virða framlag vinnufélaga sinna og
leiðbeina á uppbyggilegan hátt þegar leiðbeininga er þörf.
Yfirsýn
Allir í hópnum þurfa að hafa góðan skilning á því sem felst
í verkefninu og hvernig verkið sækist á hverjum tíma.
Stolt og ánægja
Hver og einn á að geta fundið fyrir stolti yfir vel unnu verki
hópsins þegar verkefninu er lokið.