Vaknar
þú við útvarpsvekjaraklukku og ljúfa
morguntónlist? Hlustar þú á fréttir
yfir morgunverðinum - eða horfir þú á
sjónvarpsfréttir?
Fjölmiðlar
gefa þér möguleika á að fylgjast með
markverðum atburðum á sömu stundu og þeir
gerast. Fréttir gærdagsins eru gamlar fréttir
sem fáir ef nokkur hefur lengur áhuga á - þær
eru ekki fréttir lengur. Áður fyrr þurfti
fólk að bíða dögum ef ekki vikum saman
eftir að geta lesið nýjustu fréttirnar. Þegar
Napóleon tapaði orrustunni við Waterloo í
Belgíu árið 1815 liðu þrír dagar
þar til fréttin barst til London og Parísar.
Þessi sama frétt var fjörutíu og fjóra
daga á leiðinni til dagblaða í New York. Þegar
J.F. Kennedy forseti Bandaríkjanna var myrtur í Dallas
árið 1963 höfðu 90% bandarísku þjóðarinnar
frétt af atburðinum innan einnar klukkustundar og innan
fárra klukkustunda hafði öll heimsbyggðin frétt
af morðinu.
Öll
ný upplýsingatækni hverju nafni sem hún
kallast, breytir hugsunargangi fólks og hefur áhrif
á hvernig það notar tímann. Prentlist sem
gerði bækur að almenningseign, ritsíminn, útvarp,
sjónvarp og tölvur með nettengingu eru dæmi
um tækni sem hefur breytt hugsunargangi og frístundum
okkar. Upplýsingatækni (t.d. fjölmiðlar) er
stundum kölluð ,,hjálpartæki hugsunar",
hún gerir okkur kleift að safna saman upplýsingum,
vinna úr þeim vélrænt og dreifa þeim
til annarra.
Fá
tæki hafa haft jafn mikil áhrif á að sameina
Íslendinga og útvarpið. Fyrsta útvarpssending
hér á landi var árið 1926 og þar
með var einangrun, sem sums staðar var gífurleg,
rofin. Nú á dögum geta allir landsmenn náð
bæði útvarps- og sjónvarpssendingum, þannig
að öll þjóðin getur fylgst með atburðum
samtímis. Fjölmiðlarnir tengja fólk saman
og skapa sameiginlega reynslu með þjóðinni,
jafnframt því sem fjölbreytni er það
mikil að þú getur valið á milli efnis.
Þótt enginn segist horfa á áramótaskaupið
eða Eurovision sönglagakeppnina er um fátt annað
rætt í íslensku samfélagi næstu
daga á eftir.
Tveggja
þrepa kenningin
Vísindamenn hafa haft mikinn áhuga á að
rannsaka hvernig við verðum fyrir áhrifum fjölmiðla.
Ein kenningin gengur út að áhrifin séu
þrepaskipt og gerist í tveimur þrepum.
Þrep
1: Einhver (flokkur, stofnun, félag eða einstaklingur)
kemur boðskap á framfæri gegnum fjölmiðil.
Þrep
2: Áhrifamiklir og vinsælir einstaklingar sem kallast
áhrifavaldar heyra boðskapinn og kynna hann fyrir öðrum.
Þegar þekktar eða leiðandi persónur hafa
ákveðna skoðun þá hugsa margir sem svo:
,,Já, fyrst hún eða hann heldur þessu fram,
ætti ég ef til vill að gera það líka."
Algengt
er að áróðursherferðir, eins og til dæmis
áróður gegn eiturlyfjum, fylgi ferli tveggja þrepa
kenningarinnar. Atburðarrásin (ferlið) er ekki ólíkt
því sem gerist þegar þú vilt hafa
áhrif á bekkjarfélaga þína eða
vini:
Þrep
1: Þú setur fram hugmynd (kemur með tillögu)
um frjálsa mætingu í skólanum og reynir
að vinna áhrifamikla og vinsæla einstaklinga í
bekknum á þitt band.
Þrep
2: Leiðandi einstaklingum í bekknum þínum
finnst hugmyndin algjör snilld og ákveða að
gerast stuðningsmenn hennar. Stuðningsaðilar þínir
tala sannfærandi og af miklum eldmóð um nauðsyn
frjálsra mætinga við aðra krakka í skólanum.
Miklar líkur eru á að tillaga þín
(hugmynd) verði samþykkt í bekknum og jafnvel af
öllum nemendum skólans.
|